【Emily Online】梁栢贤:唔好叫医生上大湾区开档 指北上开医院唔会抢走人手「误导」 (图)

发布 : 2019-2-21  来源 : 明报即时新闻网


用微信扫描二维码,分享至好友和朋友圈


公立医院服务「爆煲」,医护压力沉重。医院管理局今日举行新春团拜,食物及卫生局长陈肇始话,医管局总部近日都「好头痛」,几乎「不眠不休」处理问题;陈肇始仲预告,财政预算案会有好消息。医管局行政总裁梁栢贤(PY)亦话呢排成日失眠,「谂起(陈肇始)局长就瞓唔着」。

PY话见到医院迫爆,夜晚都会谂下,「做咗咁多年,我自己都有责任,医管局系咪咁差呢,系咪对唔住啲同事,对唔住啲病人呢?」不过,PY话,谂返转头,真相又未必一定系咁,「安慰下自己」,佢话相信人手问题先系症结,长远亦有机会解决,但要有好嘅政策去处理,「要人出嚟讲清楚,真系唔好叫医生上大湾区开档」。

PY话,有医生早前指,北上开医院唔系抢走医管局人手嘅讲法,系有误导成分,因为不论公家私家,都系得一班医生,「私家医生都系医管局训练出嚟」,担心会加剧医管局人手流失。被问到唔北上嘅话,会唔会比人话「唔拥抱国家」时,PY就话,大湾区个概念,系要支持国家医疗发展,但大前提系唔可以令香港市民有损失。

至于近日讨论豁免海外医生实习时间,同场嘅医务委员会主席刘允怡话,现时已检讨紧有限度注册制度。被问到可否完全豁免实习时间,佢话,如果要「一日都唔使实习」嘅话,就要修例。

PY话,如果海外医生喺医管局做咗一段时间,熟悉医管局运作,对于考获执业试后完全豁免实习嘅建议,佢觉得即使牵涉修例,都可以考虑。